মৰমৰ
ব্রিয়ান,
আশা কৰো তুমি কুশলে আছা । ফেচবুকৰ পাতত আমাৰ চিনাকি য’ত আমি বহুবাৰ বহু কথাই পাতিছো । আজি পিছে এখন চিঠি লিখিবলৈ বৰকৈ মন গৈছে মোৰ । কৰবাত শুনিছিলো চিঠিৰ আখৰে হেনু প্রিয়জনৰ ছবি কঢ়িয়াই নিয়ে । নাজানো ইন্টাৰনেট, প্রযুক্তি-বিদ্যাৰ যুগত মোৰ চিঠি মূল্য তোমাৰ বাবে কিমান । তথাপিও কলম হাতত তুলি লৈছো তোমালৈ চিঠি লিখো বুলি ।
ব্রিয়ান, মনত আছে তোমাৰ কেইদিনমানৰ আগতে কথাৰ প্রসংগত কৈছিলো গুৱাহাটীত বৰফ পৰাৰ কথা । মই যে কৈছিলো ‘নৱেম্বৰ ডিচেম্বৰ মাহত যেতিয়া গুৱাহাটীত বৰফ পৰিবলৈ আৰম্ভ কৰে, সৰু ল’ৰা ছোৱালীবোৰৰ খুব আনন্দ হয় । ৰাস্তা, ঘৰৰ চাল, ফুল আৰু গছ-গছনি, যান-বাহন বৰফেৰে ঢাক খাই বগা হৈ পৰে । গোটেই চহৰৰ ওপৰত যেন এখন অবিচ্ছিন্ন বগা আৱৰণ । গোটেই পৃথিৱীত যেন স্বচ্ছ বগা পোহৰ । পুখুৰীৰ পানীও কেতিয়াবা গোট মাৰে । গজাল লগোৱা বুট আৰু ৰঙ বিৰঙৰ টুপী পিন্ধি ল’ৰা-ছোৱালীবোৰে চিঞৰ বাখৰ কৰি সিহঁতৰ স্কী, শ্লেজ গাড়ী আৰু চকা লগোৱা ৰ’লাৰ স্কেটাৰবোৰ লৈ পৰম উৎসাহেৰে বাহিৰ হৈ পৰে’ । এই তথ্য-প্রযুক্তিৰ যুগতো তুমি ইমান সহজে বিশ্বাস কৰি লৈছিলা সেই কথা । নে মোক সুখী কৰিবলৈ ভাও ধৰিছিলা বিশ্বাস কৰাৰ ।
জানা ব্রিয়ান, মই মিছা কোৱা নাছিলো । আমাৰ ইয়াতো বৰফ পৰে । নহ’ব পাৰে হিম শীতল । তথাপি অসমলৈ আহে বৰফময় পৰিৱেশ ফেব্রুৱাৰী-মাৰ্চ মাহত । তুমি হয়তু ভাবিছা এইয়া আকৌ কেনেধৰণৰ বৰফ ? অসমৰ আকাশখনত শীতৰ দিনকেইটাত জুই জ্বলাই পলাশ শিমলুৱে । ৰঙচুৱাকৈ জ্বলা আকাশখনক শীতলতা প্রদান কৰাৰ বাবেই হয়তু কমোৱা তুলাবোৰ হিম হৈ সৰে । মায়াময় হৈ পৰে দশোদিশ । মাজে মাজে বয় অহা ফাগুনী পছোৱাজাকত যেন শুকুলা বৰফৰ বৰষুণ পৰে । চোতাল উপচি পৰে শিমলু তুলাৰ বৰফেৰে । সেউজীয়া পথাৰখনত প্রকৃতিয়ে যেন পাৰি দিয়ে শুকুলা এখনি চাদৰ । পুখূৰীবোৰতো উপঙি ফুৰে শুকুলা বৰফৰ চেকুৰ । ঠিক তোমালোকৰ দেশৰ দৰে ।
ব্রিয়ান, তুমি ছাগে মোক এজনী পাগলী বুলিয়ে ভাবিছা । আচলত কি জানা, প্রকৃতিৰ এই ৰূপ কেতিয়াবা মোৰ কল্পনাৰ দৃষ্টিয়ে চায়ো ভাল লাগে চোন । তুমি বাৰু কেতিয়াবা এনেকুৱা কল্পনা কৰা নে ? তোমাৰ অনুভৱবোৰ জনাবা চোন । আজিলৈ সামৰো দিয়া ।
ইতি
কাকলী
বিঃদ্রঃ অ তোমাক ক’বলৈ পাহৰিছোৱে । চম্পা নামেৰে তোমাৰ লগত চিনাকি যদিও মোৰ প্রকৃত নাম কাকলী ।
( ব্রিয়ান আৰু কাকলী মনালিছা শইকীয়াৰ উপন্যাস সত্যবান দুৰ হৈ নাযাবাৰ দুটা চৰিত্র । চিঠিখন লিখোতে উপন্যাসখনৰ কেইবাটাও বাক্যৰ উদ্ধৃতি দিয়া হ’ল । )
No comments:
Post a Comment